दृष्टी न्युज प्रतिनिधी :शैलेश तांबडा
मुलगा होईल या अपेक्षेने चौथ्यांदा मातृत्व स्वीकारलेल्या महिलेच्या पदरी पुन्हा एक मुलगीच आल्याने ती नैराश्यात गेली आणि या मानसिक तणावातून तिने आपल्या अवघ्या काही दिवसांच्या चिमुरडीचा गळा दाबून जीव घेतल्याची धक्कादायक घटना डहाणू शहरातील लोणपाडा येथे समोर आली आहे. ही घटना शनिवारी मध्यरात्री डहाणू उपजिल्हा रुग्णालयात घडली असून, याप्रकरणी डहाणू पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, पूनम शहा ही महिला कोलकत्त्यातून काही दिवसांपूर्वी आपल्या आई-वडिलांकडे डहाणूतील लोणपाडा येथे आली होती. येथेच तिची गृहप्रसूती झाली होती. चौथ्यांदा मुलगीच झाल्याने ती मानसिक नैराश्यात होती. प्रसूतीनंतर आई व बाळाला डहाणू उपजिल्हा रुग्णालयात दाखल करण्यात आले होते.
शनिवारी मध्यरात्री, या नैराश्याच्या गर्तेत असताना पूनमने आपल्या नवजात चिमुरडीचे नाक आणि तोंड दाबून तिचा श्वास कोंडल्याने बाळाचा मृत्यू झाला. ही घटना उघडकीस येताच रुग्णालय प्रशासनाने पोलिसांना माहिती दिली.
डहाणू पोलिसांनी तत्काळ कारवाई करत पूनम शहा विरोधात गुन्हा दाखल केला असून, चौकशीदरम्यान पूनमने हा अपराध नैराश्यामुळे केल्याचे कबूल केले आहे. तिचे सासर कोलकत्त्यात असून, माहेर उत्तर प्रदेशात आहे. मात्र तिचे आई-वडील अनेक वर्षांपासून डहाणूतील लोणपाडा येथे वास्तव्यास आहेत.या संपूर्ण घटनेचा तपास उपविभागीय पोलिस अधिकारी भागीरथी पवार यांच्या मार्गदर्शनाखाली सुरू आहे.
बातमी किंवा जाहिरात देण्यासाठी संपर्क :9834756487
